300 جرام لازانيا
حشوة اللحم : 2 كاشيك كبير زيت ذرة
½ كيلو لحم مفروم
1 بصلة كبيرة مفرومة ناعم
3 فص ثوم مهروس
2 كاشيك صغير ملح
¼ كاشيك صغير فلفل اسود
1 طاسة ماية
1 طاسة ريحان اخضر مفروم
خليط المشروم :
2 كاشيك كبير زبدة
400 جرام مشروم (فطر) شرائح
الباشميل :
6 كواشيك زبدة
½ طاسة دقيق
6 طواسي حليب
2 ورق غار
¼ طاسة جبن بارميزان او تركي مبروش
1 طاسة جبن مودزريلا مبروش
1 طاسة جبن شيدر مبروش
الطريقة :
نحطوا شوية زيت ذرة في طنجرة علي النار لين يسخن ونضيفوا عليها اللحم باش يطيب معانا ع الاخر
وبعدين نضيفوا عليها البصل المفروم والثوم المهروس ويتشوحوا كلهم مع بعض باش ياخد ريحة البصل والثوم ويعطي بنة حلوة
وماتستعجليش لاننا نبوا اللحم طايب مش مسلوق خليه علي راحته لين يطيب
وبعدين ضيفي الفلفل الاسود وبعدين نطفوا النار .
نضيفوا الريحان وطاسة الماية لاننا احني نبوا الصالصة معاي جارية مش خاترة لانها هيه اللي بتطيب اللازانيا معانا .
توه كملنا المرحلة الاولي وتوه نمشوا لمرحلتنا التانية نسخونا طنجرة او مقلاية نسيحوا فيها شوية زبدة ونذبلوا فيها المشروم او الفطر نشوحوا المشروم في الزبدة لمدة دقيقة واول ما تطلع الريحة امتاعته نزليه من ع النار وخليه علي جنب .
الخطوة الثالثة
نحضروا فيها البشاميل ناخذ الزبدة ونحطوها في طنجرة علي النار ونذوبوها ونضيفوا عليها الدقيق امتاعنا ونحركوه لين يولي لونه اصفر . بعد مايطيب وتطلع ريحة الدقيق المحمص نضيفوا عليه الحليب ونحركوا بسرعة علي النار لين يتماسك معانا .
قوام البشاميل بعد مايغلي هيكون خفيف مش غليظ هلبة لان الوصفة هادي تبي بشاميل خفيف
جيبي الطاجين امتاعك اللي بترصي فيه الازانيا
نحط طبقة من الباشميل وفوقها شرائح من الازانيا وفوقها شوية لحممع المرق متاعه وفوقه شويةا المشروم وبعدين رشة من جبن البارميزان ورشة من جبن المودزريلا ورشة من جبنة الشيدر المبروشة .
وبعدين طبقة جديدة من البشاميل وفوقها شرائح الازانيا وبعدين اللحم مع المرق متاعه وبعدين المشروم وبعدين الجبنة اللي عندنا لين تكملي مقدارك كله والطبقة الاخيرة تكون لازانيا وفوقها باشميل وعلي الوجة ضيفي الجبنة اللي قعدت معاكي علي الوجة باش تطلع البنة احلي والشكل متحمر وحلو .
ندخلوا طاجين الازانيا الفرن ونغطوة بورق الومونيوم في البداية باش تطيب كويس معانا وفي الاخير ممكن ننحوه قبل تحمير الوجة .
ندخلوها الكوشة علي درجة حرارة 170 لمدة 15 دقيقة لين تطيب .
ولما تطلع طبعا نقوللكم صحتين فطوركم
